NAGA CITY – Magseserbing dakulang katabangan para sa mga residentes kan banwaan nin Goa, Camarines Sur an natapos ng Superhealth Center sa saindang lugar.
Sa nagin patara-tara ni Goa Mayor Marcel Pan, sinaysay kaini na last year pa natawan nin budget an saindang banwaan sa tabang kan sarong Senador tanganing maipatugdok an nasambitan ng pasilidad.
Katakod kaini, sigun pa sa alkalde makalihis an limang bulan tolos man na natapos an nasambitan ng Super Health Center na magigin dakulang katabangan sa pagtataong serbisyo medikal sa mga tawo.
Dugang pa kan opisyal an banwaan nin Goa an igwang 76, 000 na populasyon sa presente kun kaya kaipuhan ninda nin apat na Rural Health Unit.
Sa presente nasa tolo na an saindang RHU kabali na an bagong tugdok na Super Health Center, kinakaipuhan na sana an saro pang pasilidad.
Pigtawan duon ni Pan na obheto kan pagpapatugdok kan siring na pasilidad an tanganing mas mairani sa saindang mga residentes an pangangataman sa saindang salud, orog na soboot ngunyan na kadakol an mga nagbubungkaras na helang.
Dakula man an ginhawa an naitatao kaini orog na sa mga hararayong lugar na dae na kaipuhan pa na magpasiring sa mga siyudad tangani sana na magpakonsulta.
Sa ngunyan, pigsierto na sana kan alkalde na mayong lugar an korupsyon sa saindang lugar asin padagos an saindang pagkrian nin mga programa na makakatabang nin marhay sa saindang nasasakupan.
