Pirang siyudad sa National Capital Region (NCR) an nakaeksperyensiya nin ‘unhealthy’ hasta sa ‘very unhealthy’ na kalidad nin duros, makalihis an pagsabat sa Bagong Taon kasuudma, Enero 1, 2025.
An datos an basado sa naikurit na air quality kan IQAir, sarong Swiss air quality technology company, hasta alas-11:04 nin pagkaaga kasuudma.
Sigun sa IQAir, an Maynila an nanutaran nin paglangkaw na air pollution level sa NCR na igwa nin air quality index (AQI) na 218.
Ini an indikasyon na kada cubic meter nin duros sa siyudad an nagtataglay nin nasa tahaw kan 125.5 asin 225.4 micrograms nin pollutants.
Sigun IQAir, an AQI na 218 an maikokonsiderar na nasa “very unhealthy” range, na boot sabihon na an general public posibleng makaeksperyensiya nin kapansin-pansing epekto.
Huli digdi, an mga sensitive groups, siring kan mga aki, senior citizens, bados, asin an mga igwa nin heart o lung conditions, an pig-enkaminar na mantinir sa laog kan harong asin magsulot nin face mask.
Kasunod kan Maynila an Makati, Taguig asin Parañaque na may AQIs na 166, 159 asin 153, na gabos pigkokonsiderar na ‘unhealthy.’
An Pasig asin Marikina man an igwa nin AQIs na 134 asin 118, na pigkokonsiderar na ‘unhealthy’ para sa sensitive groups.
An bakong marhay na kalidad kan duros an igwa nin delikadong epekto sa publiko, partikulamente na sa vulnerable populations, na posibleng magresulta sa iritasyon kan mata, balat asin lalamunan, siring kan respiratory issues.
An iba pang siyudad kan NCR, siring kan San Juan, Caloocan asin Quezon City, an igwa nin moderate air quality, na pigkokonsiderar delikado sa salud, huli sa presensiya kan nasa 9 micrograms nin pollutants kada cubic meter kan duros.
Sulamenteng an Mandaluyong City an siyudad na nakapagrehistro nin marhay na kalidad kan duros, makalihis an pagsabat sa Bagong Taon, na may AQI na 50.
