NAGA CITY-Pig-apod na fake news kan pamayo kan City Disaster Risk Reduction and Management Office-Naga an nagkukuriyat na impormasyon sa social media dapit sa paggamit kan bagong lunadan kan ahensiya sa pangangampanya.
Sa nagin paghampang sa mga kagawad kan media ni Allen Reondanga, pamayo kan City Disaster Risk Reduction and Management Office-Naga, sinaysay kaini na an nasambitan ng pekeng impormasyon an parte soboot kan dalagan kan pulitika orog na ta mainit na marhay an pulitika sa probinsiya kan Camarines Sur.
Katakod kaini, pangapudan kan opisyal sa publiko na magin maingat sa mga post na nababasa online huli ta an iba sa mga ini an dae man totoo asin obheto sana na rauton an iba.
Dugang pa ni Reondanga, sa FB post kun saen mababasa an nasambitan ng fake news, pirme man soboot na mayong ginigibong tama an siyudad.
Pig-enkaminar pa ni Reondanga an publiko na dae magtubod sa mga imbentong bareta na mayo man katotohanan.
Pigpaliwanag man kaini na an lunadan kan ahensiya an ginamit sa pigkundusir na 2 day training sa Maangas.
Sa ngunyan, hagad na sana kan opisyal na magin matuninong an ikukundusir na eleksyon tanganing malikayan an anuman na katibaadan.
