NAGA CITY- Dakulang kaogmahan kan LGU-Naga an pagkakakua kan siyudad sa panduwang pwesto sa 2024 Cities and Municipalities Competitive Index.
Sa nagin paghampang sa mga kagawad kan media ni Naga City Administrator Lito Del Rosario, sinaysay kaini na sa bilog na Pilipinas o katampad kan halos 1,642 na mga syudad asin munisipyo sa bilog na nasyon nasa ikaduwang pwesto an Naga City kun an pag-uurulayan an dapit sa performance kan siyudad.
Sigun sa opisyal, an nasambitan ng pagbisto an nagpapahiling sa resiliency, economic dynamism kan Naga sa ibong kan mga huma na naeskperyensiyahan sa bilog na taon.
Kasabay kaini, maski dakulang challenge para sa siyudad an dapit sa pangangaipuhan sa mas dakulang palupadan, kawaran nin port alagad naglalangkaw man an mga negosyo na nagbubutwa sa lugar na dakulang tabang para sa ikakauswag kan ekonomiya.
Dugang pa kan opisyal, an mga sadit na negosyo an pig-aalalayan kan siyudad tanganing mas orog pang magtalubo mantang padagos man an suporta sa iba pang mga negosyo.
Mientrastanto, mantinido man an peace and order sa paagi kan mga kapulisan na malalaoman sa pagbantay sa bilog na Naga City.
An mga maray na programa na ini kan LGU-Naga an nagseserbeng dalan tanganing magin posible an mga pagbisto na narereseber kan siyudad.
Sa ngunyan, pigsierto na sana kan opisyal na padagos an paglalapigot kan lokal na gobierno kan Naga sa pangengenot kan saindang alkalde tanganing mas orog pang mabisto an Naga City.
