Nakua kan De La Salle University an solo third spot makalihis katayin an Far Eastern University, sa skor na 25-17, 25-20, 25-22, sa UAAP Season 87 women’s volleyball tournament kasuudma sa Smart Araneta Coliseum.
Nabulaga kan Lady Spikers an Lady Tamaraws kan mag-arangkada sa opensa si Shevana Maria Nicola Laput na nagkurit nin 22-point performance tanganing ilista an 5-2 karta kan Taft-based squad.
Apwera sa four-game winning streak kan La Salle, napalaba man ninda an pamamayagpag sa FEU na pitong sunod na nindang pigdadaog puon pa kan Season 82.
Naghapag nin sarong puntos an Lady Spikers, sa skor na 17-18, sa third set alagad nagin matikas an kawat kan 6-foot-2 na si Laput kan magrapar nin mga kills asin krusyal block tanganing agawon an 22-19 bentahe sa Lady Tamaraws.
Nagkurit si Alleiah Malaluan nin 12 points asin may 10 markers si Angel Anne Canino, mantang walo an tinipa ni Amie Provido para sa La Salle.
Nagbida man si Faida Bakanke nin siyam na puntos asin walo an pigskor ni Gerzel Mary Pettalo para sa FEU na nalaglag an baraha sa 4-3.
