NAGA CITY – Pigheras kan sarong meteorologist sa banwaan kan Libmanan an importansya kan pag-obserbar sa World Meteorological Day ngunyan na aldaw, Marso 23, 2025.
Sa entrevista kan Bombo Radyo Naga ki Threcia Mae Septimo, Warning Section Officer Designate kan MDRRMO Libmanan, sinaysay kaini na an nasambitan ng obserbasyon an nagtatao nin awareness sa mga tao partikulamente an mga nangyayari sa satuyang kinaban orog na sa satuyang nasyon kun saen, prone sa mga natural hazard partekulamente na sa pagrasay kan daga, bagyo, pagbaha asin iba pa.
Mientrastanto, an trabaho kan meteorologist an nag-aadal sa atmosphere, siringman, nakikipagkoordinar man sinda sa state weather bureau tanganing mamonitor an weather condition.
Sigun ki Septimo, importantehon an pagtatao nin tamang weather forecast kada aldaw orog na kun igwa nin bagyo tanganing makatabang sinda sa pagtao nin mga intervention tanganing magin salbado an mga tawo.
Piglinaw man ni Septimo na an mga nangyayaring kalimidad sa kinaban an unpredictable asin bako man 100% accurate an weather forecast.
Kun kaya, nagpapaluwas sinda nin forecast kada tolong oras orog na kun igwa nin bagyo o an weather bulletin.
