Opisyal nang naibalik an regular na biyahe kan mga pampasaherong jeepney sa Coastal Area kan Libmanan matapos an 15 taon.
An lakdang na ini inaasahan na makakapagpagian sa gastuson asin makakapagparikas sa pagbiyahe kan rinibong residente sa mga barangay sa baybayon.
Segun ki Mayor Edelson Marfil, an alkalde kan banwaan nin Libmanan Camarines Sur, resulta ini kan paghihigos kan lokal na gobyerno sa paagi kan pakikipagtabangan kan Municipal Planning and Development Office (MPDO) na pinamamayuhan ni Wowie Dollente, asin kan Sangguniang Bayan sa pamamayo ni Vice Mayor Atty. Ariel Oriño, makalihis aprubahan kan Department of Transportation (DOTr) an mga ruta sa mga Coastal Community.
Segun ki Marfil, nagbalik na an biyahe kan mga jeepney na nagseserbisyo sa mga barangay hale Bahao paduman sa Naga, Libmanan, asin San Vicente. Kaiba sa opisyal na mga ruta an Tinalmud–Naga asin Tinalmud–Libmanan, na haloy nang kahagadan kan mga residente matapos mawaran nin regular na pampublikong transportasyon sa haros 15 taon.
Dakula man an ibinaba kan pamasahe sa bagong operasyon kan Transport Cooperative. An dating nag-aabot sa haros ₱500 na one-way fare hale Tinalmud paduman sa Naga, nagin ₱200 na sana. An dating ₱1,000 na balikan, nagin ₱400 na sana.
Mantang an biyahe haleng Tinalmud paduman sa Libmanan nagkakahalaga na sana nin ₱150 kada biyahe.
Apwera sa pagbabalik kan mga ruta, ipinapadagos man kan lokal na Gobyerno an rehabilitasyon kan tinampo sa Barangay Salvacion.
Segun ki Mayor Marfil, kabali an pagbabalik kan Coastal Jeepney routes sa obheto kan saiyang administrasyon na mapahewas an access sa pampublikong transportasyon, mapababa an gastos sa pagbiyahe, asin mapakusog an koneksyon kan mga Coastal Barangay sa sentro kan banwaan asin sa Naga City.
Inaasahan na an lakdang na ini matao nin mas dakulang oportunidad sa kabuhayan, edukasyon, asin iba pang serbisyo para sa mga residente.
