Binawian nin buhay sa Israeli airstrike sa southern Gaza an sarong Hamas political leader na si Salah al-Bardaweel, kan nakalihis na Domingo susog sa militanteng grupo, sa pagtataya kan Palestinian officials, nagpakol na an death toll sa haros 18 bulan nin kariribokan sa labi sa 50,000.
Makalihis man an duwang bulan na untok-kariribokan, liwat na nag ebakwar an mga Gazans makalihis na abandonahon kan Israel an ceasefire, kun saen naglunsar nin panibagong all-out air asin man ground campaign kan nakalihis na aldaw nin Martes kontra sa Hamas.
Nadangog an mga pagsabog sa north, central asin man southern Gaza Strip kan aldaw nin Dominggo, sa pag-atake kan Israeli planes sa nagkapirang mga targets.
Dae man mababa sa 30 Palestinians an nagadan sa Israeli strikes sa Rafah asin Khan Younis, basado pa sa health authorities. Sinabi kan Hamas na binawian nin buhay sa airstrike sa Khan Younis si Bardaweel asin man an saiyang agom.
Si Bardaweel an miyembro kan Hamas decision-making body, an political office, asin man nanungkulan komo lider kan Hamas delegation para sa indirect truce talks sa Israel kan nakalihis na taong 2009 aain nangenot sa media office kan grupo kan nakalihis man na 2005.
Pirang utro na inihayag ni Israeli Prime Minister Benjamin Netanyahu na an mayor na obheto kan giyera iyo man an buwagon an Hamas komo military asin man governing entity.
Sa huring karkulo, nasa 50,021 Palestinians an nagadan asin 113,274 an irido magpuon kan kapinunan man kan gyera, susog pa sa health ministry.
