Piglalaomang mas kadakol na ebidensiya pa an isusunad kan prosecution team kontra ki dating Presidente Rodrigo Duterte sa mga masunod na aldaw.
Kasuodma, ipinasakamot na kan prosecution an enot na set kan mga ebidensiya sa International Criminal Court (ICC) asin sa kampo kan dating Presidente.
Ini an pigbibilog kan 181 na pidaso kan mga ebidensiya na nakatalaang ipresentar sa paglitong kan trial kontra sa dating Presidente.
Siring man, piglalaomang isusunad pa an ibang pidaso kan ebidensiya sa mga masunod na aldaw, antes an deadline na April 4 na itinalaan kan International Court.
Pigbibilog ini kan mga written documentation, mga ladawan, video, asin audio recording.
An natatadang ebidensiya, kaibahan an posibleng mga ipe-presentar na testigo kun igwa man, kaipuhan i-disclose kan prosecution team antes magpaso an deadline na ipigtalaan kan international court.
Basado sa polisiyang pigsusunod kan nasambitan ng korte, dapat amay na maimpormahan an ICC-Pre Trial Chamber I kun balak kan prosecution na maghagad nin protective measure sa mga testigos asin biktuma na mawot kaining ipresentar, kaibahan na an iba pang indibidwal na pwedeng mahampang sa anuman na huma, enkaso iluwas an saindang pagkakakilanlan.
Mientrastanto, igwa man hasta April 11 an kampo kan dating Presidente tanganing isumiter an mga counter-evidence kaini.
Kaipuhan man impormahan kan Duterte Camp an ICC kun igwa ining mga testigos sa nakatalaang confirmation hearing.
