Nagpakol na sa 4.07M metriko tonelada an inangkat na bagas kan Pilipinas bago pa lubos na maramdaman an grabeng epekto kan El Niño.
Ini base sa opisyal na datos hale sa Bureau of Plant Industry.
Mas halangkaw ini nin 20.06 % kumpara sa 3.39M metriko toneladang nairehistro kan nakaaging taon.
Nagsesirbing pangenot na gikanan kan bagas kan nasyon an Vietnam na nagsusuplay nin 2.73M metriko tonelada, na sinundan kan Thailand asin Myanmar, mantang an natatadang parte naghali sa Cambodia, Pakistan, India, South Korea, Japan, asin Italy.
Tinantyang maabot pa sa 5M metriko tonelada an kabilugan na inangkat na bagas ngunyan na taon.
Ini, segun sa sainda, tanganing protektaran an local buffer stock laban sa huma kan El Niño.
Mientras tanto, base sa Daily Price Index kan Department of Agriculture, naglangkaw na sa P60.74 kada kilo an imported special rice, mantang an premium rice nasa sobra P55.
An well-milled rice man nagkakantidad nin sobra P48, asin an regular milled rice nasa sobra P45 kada kilo.
Bagas, Importasyon, El Niño, Ekonomiya, Agrikultura
