NAGA CITY- Nabenipisyaran an nagkapirang barangay sa siyudad nin Naga asin komunidad sa pigdonar na First Aid Kit kan Philippine Red Cross – Camarines Sur Chapter gikan sa sarong kompanya.
Sa entrevista kan Bombo Radyo Naga ki Maria Felisa Badiola, OIC, Philippine Red Cross-Camarines Sur Chapter, sinaysay kaini na gikan an nasambitan ng anom na first aid kit sa sarong kompanya na obhetong magampanan an saindang social responsibility.
Katakod digde, an mga nabenipisyaran na barangay sa siyudad nin Naga iyo man an Brgy. Triangulo, Tinago, Tabuco, asin Sabang siringman an Partido State University College Red Cross Youth Council asin Baao Community College Red Cross Youth Council.
Sigun pa sa opisyal an mga siring na lakdang an nagpapapusog sa kasalbaduhan asin resilience kan komunidad sa paghampang sa manlaen-laen na huma.
Dugang pa ni Badiola, an kompanya na nag-donar kan first aid kit iyo man an nag-orgnisar kan gabos, sinda an nag-mobilize asin nagtao nin asistensiya sa Philippine Red Cross – Camarines Sur tanganing magin matrayumpo.
Apwera sa pagdonate nin first aid kit, an kompanya an nagkukundusir nin blood donations asin feeding program sa nangangaipuhan na komunidad.
Sa ngunyan, nagpasalamat na sana si Badiola sa saindang mga nakakaibahan na mga organisasyon sa paghahatod nin serbisyo sa mga tawo.
