Nagtalaga an Philippine National Police (PNP) nin dugang na pwersa para sa pag-obserbar kan Semana Santa ngunyan na huring semana kan Kwaresma.
Pigkumpirmar ni PNP-Public Information Office Chief Col. Randulf Tuaño, na matalaga an saindang hanay nin dugang na 25,000 na pulis komo dugang na seguridad sa manlaen-laen na parte kan nasyon.
Kun marurumdoman, nag-deploy na nin 40,151 na personahes an PNP gikan sa saindang hanay para sa Ligtas SumVac 2025 na nagpoon ngunyan na Abril hasta sa masunod na bulan.
An dugang na pwersa gikan sa saindang hanay an para sa espesyal na pag-obserbar kan Leten Season ngunyan na taon na nagpoon kan Abril 14 hasta Abril 20.
Sinaysay man ni Tuano na itatalaga an dugang na deployment sa mga spots na dadagsaon kan publiko, partikulamente na sa mga terminal orog na sa mga simbahan. Soboot, gikan sa nasambitan ng numero, 19,000 digdi an mga volunteers na i-assign sa manlaen-laen na simbahan sa nasyon tangani na madugangan an police visibility direktiba gikan ki PNP Chief Rommel Francisco Marbil.
Obheto man kaini na maibitaran an mga potensyal na huma sa mga pantalan, terminal orog na sa mga simbahan.
Mientrastanto, dati nang pigsierto kan PNP sa publiko na matinir na alerto an bilog na pwersa kan kapulisan sa bilog na Holy Week period mantang bukas man an saindang mga help desk para magresponde sa anuman na pangangaipohan asin insidente.
