Dagusan nang pighali kan Phoenix Suns an head coach kaining si Mike Budenholzer kasunod kan pagtatapos kan mga regular game sa 2024-2025 season.
Marurumduman sa ibong kan pagkakawat kan tulong star na sinda Kevin Durant, Devin Booker, asin Bradley Beal, an dae nagin marahay an pagtatapos kan regular season kan Suns asin nag abot sana sa 36 an mga games na nagibong maipanggana kan koponan mantang kumamada ini nin 46 na pagkadaog.
Sa huring sampulong kawat kan koponan, saro sana an nagibo nindang maipanggana asin dae na ini nakalaog pa sa Play-In Tournament.
Primerong na-hire si Budenholzer sa Phoenix kan nakalihis na May 2024 asin niribayan an dating head coach na si Frank Vogel. Siringpaman, dae man nagin nagin marahay an record kan batikang coach mantang pinapangenutan an Phoenix.
Sa pagpupuon kan regular season an nagin marahay pa an record kan koponan asin nagibo ninda na ibulsa an 8-1 win-loss record. Siringpaman, nagka-injury si Durant makalihis an pirang semana na pagpupuon kan regular season asin dae na dagusang nakabalik pa an koponan, dawa na nagin pakarhay na an kamugtakan kan gabos kan mga star player kaini.
Sa presente, mayo pang nagriribay sa batikang coach.
Marurumdumang kan nakalihis na taong 2021 an pinangenutan ni Coach Budz an Milwaukee Bucks tangani ibulsa kan koponan an championship sa taong ito.
Nagibo kaidto kan Bucks na pataubon an Phoenix Suns, an koponang nangibabaw sa western conference.
