Ibinasura kan International Criminal Court (ICC) an kahagadan kan lado ni dating Presidente Rodrigo Duterte na higotan an mga pigtanggap na identification documents kan mga biktima kan drug war sa kaso kan crimes against humanity kontra saiya.
Sa desisyong ipinaluwas kan Abril 17, tinugutan kan ICC Pre-Trial Chamber I an rekomendasyon kan International Criminal Court Registry na magtanggap nin manlaen-laeng klase nin government-issued IDs siring kan birth certificate, senior citizen card, barangay certificate, driver’s license asin iba pa—bako sanang pasaporte o National ID siring kan pighahagad kan kampo ni Duterte.
Pighurot kan abogado ni Duterte na si Nicholas Kaufman na kaipuhang higotan an requirements ngaining maibitaran an fraud asin salang pagkakakilanlan, alagad, kinontra ini kan mga abogado kan mga biktima, na inapod an propwesto bilang “anti-poor.”
Susog sa ICC, bastante an presenteng proseso kan verification nganing siertohon an pagkakabisto kan mga biktima asin maibitaran an pandaraya.
Mientrastanto, ipigtakda man kan ICC an deadline kan prosekusyon sagkod Hulyo 1 nganing maisumiter an gabos na ebidensyang ilalatag sa nakatalaang confirmation-of-charges hearing sa Setyembre 23, 2025.
Kairiba digdi an testimonya kan mga saksi, video, audio recording asin labing 9,000 pahina nin dokumento.
Magigiromdoman na nahahampang si Duterte sa kasong crimes against humanity katakod kan suboot 43 na extrajudicial killings puon 2011 sagkod 2019, kairiba an mga insidente kan siya alkalde pa kan Davao City.
