Nagisyu na nin notice an Department of Agriculture (DA) tangani pagpalinawagon an mga retailers sa sarong merkado sa Marikina sa dae pagsunod kan mga ini sa pigtalaan na maximum suggested retail price sa mga produktong urig asin bagas.
Nadakop kaya kan departamento an mga ini na nagpapabakal nin mas mahal kumparar sa napagulayan na MSRP. Sa saindang ikinasang random inspection sa merkado ay nadakop ninda an mga tindera na nagpapabakal nin liempo na nasa presyuhang P430/kilo mantang an pigue asin kasim man ay mababakal sa presyong P400/kilo.
An presyong ini ay mas mahal kumparar sa pigtalaang MSRP kan departamento na P380/kilo para sa liempo asin P350/kilo man para sa barakalan kan pigue asin kasim. Sa datos, 20% sana an nag-comply sa pigpapautob na MSRP magpuon kan nagin implementasyon na ini kan nakalihis na Marso 10.
Sigun man ki DA Asec. Genevieve Velicaria-Guevarra, sinundan sana soboot kan mga retailers an presyo kan mga dealers asin magin kan mga naresiber nindang mga deliveries.
Sa parte man kan mga produktong bagas, nanutaran man kan DA na may mga nagpapabakal nin P52/kilo nin imported premium rice sa nasambitan ng merkado, na iyong mas halangkaw kumparar sa pigtalaan na P45/kilo.
Sigun pa ki Guevarra, kadakol an suplay kan bagas ngunyan kan nasyon kaya man dae mahiling kan ahensya kun ano an rason kun tano kaipuhanon pa na maglangkaw nin presyo an mga retailers.
Minetrasnto, nagkapirang mga retailers man an nagsasabi na huli sa halangkaw na renta sa mga pwesto an nagin rason kan saindang paglalangkaw nin presyo. Sa ngunyan, nakatuktok na an departamento sa pagpakarhay asin pagpapa utob nin striktong implementasyon kan MSRP’s sa mga nasambitan ng produkto.
Marurumduman kaya na posible na magin parte na kan striktong implementasyon na ini an pagsasampa nin mga kaukulang reklamo sa mga retailers na iyong nasa irarom kan Price Act.
