NAGA CITY- Pig-implementar na kan Phillipine Red Cross Camarines Sur Chapter an saindang membership insurance.
Sa entrevista kan Bombo Radyo Naga ki Maria Felisa Badiola, Chapter Administrator kan Phillipine Red Cross-Camarines Sur, sinaysay kaini an saindang pig-implementar na membership insurance makakatao nin tabang sa oras kan rimalaso na kawsa kan aksidente.
Sigun ki Badiola, pwede magkua an nag-eedad 3-anyos hasta 85-anyos tanganing magin miyembro kan nasambitan ng insurance.
An presyo nagkakantedad nin nasa P50 hasta P300 pesos para sa mga estudyante asin sa iba pang mawot na mag-avail kaini.
Katakod digde, pig-enkaminar man kan opisyal na magkua an mga may pamilya asin an mga employer para sa saindang mga empleyado nin enhanced platinum na nagkakantedad nin nasa P1,200 na pwede magamit sa laog kan sarong taon.
Dugang pa digde sinaysay man ni Badiola na igwa na ining kaiba na sarong bag kan dugo asin ambulance service na itatao sa mga makua kan siring na platinum.
An mga mawot soboot na magkua kan nasambitan ng insurance magpasiring na sana sa pinakaharaning PRC branch.
Maruruduman an Philippine Red Cross sarong humanitarian organization sa nasyon na nagtatao man nin tabang sa panahon kan pangangaipuhan.
