NAGA CITY- Pigtawan duon kan sarong abogado na kaipuhan liwat na papusugon an pangangataman asin pagproteher kan gobierno sa mga obrerong Pinoy.
Sa entrevista kan Bombo Radyo Naga ki Atty. Abelardo Quilaton Jr, Legal practitioner, CEO asin may-sadiri kan Quilaton Law Office, sinaysay kaini na kadakol na mga ley an nagpoproteher sa mga obrero sa nasyon na nakapalaman man sa konstitusyon na mandatong ipautob kan gobierno.
Kabali digde an labor code of the Philippines na kun saen nakapalaog an mapadapit sa working hours, sweldo, rest period asin iba pa kan mga manggagawa.
Apwera digde, pigkriar man an Regional Tripartite Wages and Productivity Boards (RTWPBs) na igwang mandato na magibo nin pag-aadal asin magrekomendar dapit sa magiging sweldo kan mga obrero kada Rehiyon.
Importante soboot an nasambitan ng opisina tanganing mapangatamanan an mga derechos kan mga obrero asin dae maabuso an saindang mga narereseber na benipisyo. Dugang pa ni Quilaton, yaon man an anti-age descrimination, Anti-Sexual Harassment Act, safe spaces act, Occupational Safety and Health Standards Law asin iba pa na obhetong mas magin salbado an mga obrero sa saindang pinagtatrabahuhan na lugar.
Mientrastanto, kasabay sa selebrasyon kan Labor Day ngunyan na aldaw liwat na pigtawan duon kan abogado na importanteng natatawan nin pansin an sektor kan paggawa orog na ta ini an nagseserbeng backbone kan ekonomiya kan nasyon. Enkaso dae naitatao an dapat na para sa mga obrero padagos na makakaeksperyensiya nin krisis sa trabaho an nasyon.
Sa ngunyan, hagad na sana kaini na mayong mga obrero an naaabuso sa presente asin nadadangog an saindang agrangay para sa ikakarahay kan gabos.
