Tinawan duon ni UP Diliman College of Media and Communication Professor Danilo Arao na dapat tawan nin atensyon ni Presidente Ferdinand Marcos Jr an kamugtakan kan mga tios asin manlaen-laen na sektor kan sosyudad sa saiyang maabot na State of the Nation Address (SONA).
Sa intrevista kan Bombo Radyo Naga kay Dr. Danilo Arao, Professor | UP Diliman College of Media and Communication, piglalaoman na pag-oolayan kan Presidente an kamugtakan kan ekonomiya asin an mga naginibohan kan administrasyon, alagad dae dapat limitado sana sa naginibohan kan gobyerno an saiyang report sa nasyon.
Importante man suboot na sambiton man sa SONA an mga problemang inaatubang kan mga obrero, paraoma, mga katutubo asin iba pang sektor, kabali na an isyu kan living wages, reporma sa agrikultura asin ancestral land rights.
Sinabi pa ni Arao na dapat realistiko an mensahe kan Presidente asin magpahiling man kan mga problema na padagos na inaagihan kan mga tawo, lalo na an mga nasa gilid kan sosyudad.
Dugang pa kaini, dakula an papel kan media sa pagbareta kan iba-ibang pananaw sa SONA—puon sa pahayag kan administrasyon sagkod sa mga agrangay kan mga sektor na malansar nin mga aksyon kasabay kan taunan na pagtaram kan Presidente.
