NAGA CITY – Pinahimutikan kan NFA- Camarines Sur an alegasyon kan iba na maluya an kalidad kan bagas na saindang napo-prodyusir.
Sa entrevista kan Bombo Radyo Naga ki Marbin Malabanan, Officer in Charge, Branch Manager kan NFA-Camarines Sur, sinaysay kaini na nahihiling man kan saindang lado na marhay an kalidad kan saindang bagas.
Dugang pa digdi, nakikipagkoordinar sinda sa pribadong millers asin nagre-request sinda kun anong klaseng bagas an itatao sa sainda, siring na sana kan well-milled.
Saro sa rason kaini an huli ta gikan sa mga local farmers an palay na saindang pigbabakal, boot sabihon magayon na kalidad ini orog na ta kaipohan nindang magsunod sa marhay na kalidad kan palay.
Dugang pa kaini, igwa sinda nin quality assurance officers, asin pest control officer na macheck sa mga palay asin bagas.
Sigun ki Malabanan, namumundo sinda kapag igwa nin nadadangog na bakong marhay an kalidad kan bagas na saindang napo-prodyusir.
Katakod kaini, bukas man an saindang opisina sa mawot na mag-check sa kalidad kan NFA rice.
