Pigsierto kan Presidential Anti-Organized Crime Commission (PAOCC) sa Korean community na nagtitinir sa laog kan nasyon na nagpapautob an gobyerno nin mas pinahigot na aksiyon kontra sa mga krimen sa nasyon.
Sa sarong pahayag, nagtao nin pagsisierto si PAOCC Chaiperson Executive Secretary Lucas Bersamin na naglatag an saindang komisyon nin mga plano tanganing mamantinir na salbado an mga korean nationals mantang nagtitinir an mga ini sa Pilipinas.
Kaibahan sa saindang piglatag an revitalization kan mga security desk na iyong matao nin mga police visibility asin mahigot na koordinasyon sa mga lokal na gobyerno para sa saindang kasalbaduhan.
Pigpromesa man kan PAOCC na mas mahigot sinda kan seguridad sa mga lugar siring kan Angeles City, Manila asin magin sa Cebu kun saen mas igwang pinakahalangkaw na naglalaog na mga banyaga.
Mientrastanto, maruruduan man nagkaigwa na nin mga dayalogo sa tahaw kan Pilipinas asin kan United Korean Community Association kan Biyernes, kun saen pighagad man kan organisayon na magkaigwa nin mas makusog na reinforcement an Philippine government sa pagmamantinir kan kasalbaduhan kan saindang mga kababayan dara kan pagigin madalas na pag-target sa mga korean nationals maski pa residente kan nasyon o maski mga turista.
