NAGA CITY- Nagpapadagos an 90-day Dry Run kan Local Public Transport Route Plan sa siyudad nin Naga.
Ini an pigpuonan kan nakalihis na Mayo 7, 2025 susog sa Resolution No. 2025-128 asin 2025-172 na ipinaluwas kan Sangguniang Panlungsod kan Naga.
Sa nagin paghampang sa mga kagawad kan media ni Naga City Councilor Omar Buenafe, sinaysay kaini na antes an aktwal na implementasyon asin pag-institutionalize sa paagi kan ordinansa kaipuhan muna an pagkundsuir nin dry run para sa nasambitan ng ruta.
Sigun ki Buenafe, pig-aprubahan ini kan DOTR asin pig-endorse man sa LTFRB. An nasambitan ng plano an pigmukna sa irarom kan proponidong Public Utility Jeepney (PUJ) Rationalized Routes.
Sa laog kan 90 aldaw, hihilingon sa paagi kan dry run kun epektibo an mga rutang Loop C asin Loop D para sa mga commuters, PUJ drivers asin operators.
Katakod digde, dae soboot piglalaoman an dagsa kan mga pasahero orog na ta nasa bakasyon an mga estudyante alagad an ruta na ini an dakulang kagianan an maitatao sa publiko partikular sa mga commuters.
Aagihan kaya sa ruta na ini an mga lugar kun saen yaon an darakulang eskwelahan, establishments, sentro kan Naga asin mga area na vibrant an business activities.
Dugang pa kan konsehal kaipuhan an dry run tanganing mapakarhay an mga dapat pa na plantsahon, mga dapat na simbagan asin dapat na pagayunon sa ruta.
Saindang pig-aako an anuman na suhestyon kan publiko orog na an gikan sa mga commuters asin sa mga operators.
Sa ngunyan, naglalaom na sana si Buenafe na maaaprubahan an ruta para sa kagianan kan publiko.
