NAGA CITY – Nagpapadagos an pigsasagibong preparasyon sa ikukundusir na National Youth Day 2025 sa maabot na Hunyo sa Archdiocese of Caceres sa siyudad nin Naga.
Sa nagin paghampang sa mga kagawad kan media ni Allen Reondanga, OIC kan City Disaster Risk Reduction Management Office, sinaysay kaini na padagos an saindang pagsibot sa isasagibong aktibidad, kun saen sa maabot na Hunyo 10 hasta 14, labi sa 7,000 na mga jovenes na gikan sa manlaen-laen na lugar sa bilog na nasyon. Apwera pa digdi, piglalaoman man an pag-abot kan mga obispo asin mga bisita.
Mientrastanto, sa nasambitan ng aktibidad, gigibuhon an pamisa, pagtiripon siring kan Youth Congress, asin igwa nin pitong lugar o mga parokya na dudumanan, siring na sana sa mga parokya sa siyudad nin Naga, asin pagtaraid na banwaan, siring kan Calabanga, Bombon, Palestina Pili, Canaman, Magarao, Camaligan, Gainza, Baao, Nabua, Iriga, asin Bato. An mga ini an magigin harong kan mga partisipantes.
Katakod kaini, sa enot na aldaw kan aktibidad, isasagibo an Lakbay Alalay sa border kan Milaor asin Pili, siring man sa parte kan Camaligan asin Canaman. Katuwang digdi an PNP, Tourism Office, asin iba pang mga ahensya. Igwa man nin mga nakadeploy na PNP personnel sa lambang Parokya.
Sa ikaduwang aldaw man, ikukundusir an Traslacion Procession, kun saen nasa 16-k na katawo an piglalaoman na makikisumaro. Huli digdi, posible na ipautob an suspensyon kan trabaho sa siyudad pagkahapon, orog na ta kakaipohanon an lugar para pag parking kan mga behikulo, mantang pighahaman naman an traffic rerouting kan Public Safety Office asin Engineering Division.
Sa ikatolong aldaw man, magkakaigwa nin formation an mga participantes kun saen, apat na mga mayor na lugar sa siyudad an gagamiton na venue.
Pag-abot man sa ikaapat asin huring aldaw, isasagibo an closing ceremony kun saen, magigin one way man an Balatas Road.
