Lumubog an sarong liberian-flagged cargo ship na may kargang mga peligruso na kemikal sa parte kan kadagatan kan Kerala, India susog sa report kan Indian Navy kan nakalihis na aldaw nin Dominggo.
Lunad kan nasambitang barko an 24 na tripulante gikan sa manlaen-laeng nasyon kabali na an Georgia, Russia, Ukraine, asin man Pilipinas na naisalbar man kan mga awtoridad.
Napagaraman na an nasambitan ng cargo ship o MSC ELSA 3 na may 184 metro an laba ay naglalayag gikan Vizhinjam pasiring Kochi kan ini ay magpadara nin distress signal kan nakalihis man nin Sabado.
Nanutaran an barko gamit an mga eroplano kan Indian Navy sa 38 nautical miles southwest kannKochi na nakalutang soboot sa sarong delikadong posisyon.
Sa sarong pahayag sinaysay kan Indian Ministry of defense, 640 containers an lunad kan barko, kabali an 13 hazardous containers asin man iba pang 12 na may laog na calcium carbide —sarong kemikal na ginagamit sa paggibo nin abono asin bakal.
Karga man kan lumubog na barko an nasa 370 toneladang langis asin fuel, alagad sigun sa coast guard, mayo pa man nin naiirehistrong oil spill sa lugar.
Mientrastanto, nakapreparar na an Indian Coast Guard para sa posibleng pollution response kontra sa huma kan oil spill sa kadagatan kan Kerala.
