Pinapabayaan na sana kan Philippine National Police (PNP) an mga batikos na saindang nareresibe sa pagtugis ki Senator Ronald ‘Bato’ Dela Rosa na may warrant of arrest hale sa International Criminal Court (ICC).
Segun ki Philippine National Police (PNP) chief Gen. Jose Melencio Nartatez Jr., aram niya na ginigibo kan saiyang kapulisan an saindang trabaho asin an gabos na makakaya tanganing tuluyang maaresto an Senador.
Igwa man sindang nagkapirang operational secrets na dai dapat maaraman kan publiko tanganing dai mabulyaso an saindang operasyon.
Nagtutubod man an hepe kan PNP na igwang grupo na nagkukupkop sa Senador alagad naghabo siyang sambiton kun siisay an mga ini.
Magigirumduman na kan Oktubre 30 nagtapos na an ultimatum na itinao kan PNP sa Senador alagad naglalaom pa man giraray sinda na boluntaryong sumuko ini tanganing malikayan an ano man na madugong engkuwentro.
