Pinag-aadalan ngunyan kan Commission on Elections (COMELEC) an posibilidad kan pagsasagibo nin voter registration sa banggi tanganing maenkaminar an mas kadakol na Pinoy na magparehistro para sa Barangay asin Sangguniang Kabataan Elections (BSKE) na ikukundusir sa Disyembre 1.
Sigun ki COMELEC Chairman George Erwin Garcia an lakdang na ini an parte kan pagpapahewas kan Register Anywhere Program (RAP) na nakatalaang isagibo puon Hulyo 1 hasta 11.
Target kan poll body na isagibo an enhanced Register Anywhere Program sa mga lugar na igwa nin operasyon pagkabanggi, siring kan mga palupadan, pantalan, asin pirang mga lugar kan trabaho.
Katakod pa kaini, naglalaom an komisyon na sa paagi kan dugang na oras para sa pagpaparehistro, makakapotan ninda an target nila na magkaigwa nin 1 milyong bagong rehistradong botante.
Mientrastanto, apwera sa mga bagong registrant, maako man an COMELEC nin aplikasyon para sa reactivation asin transfer kan rehistro asin iba pang kaugnay na serbisyo puon sa Hulyo 1 hasta 11.
