Pigsierto kan National Bureau of Investigation na dae kaiba ni dating Negros Oriental Representative Arnolfo ‘Arnie’ Teves Jr. an saiyang kapwa mga akusado sa laog kan kulungan mantang kinakaatubang an mga patung-patong na kaso.
Ini mismo an kinumpirmar kan presenteng direktor kan kawanihan na si Retired Judge Jaime B. Santiago manungod sa kun siisay an kaibahan kan dating kongresista mantang yaon sa saindang kustodiya.
Bagaman yaon sa sarong detention facility an mga ini, saiya man na pig asegurar na magkakarayo an mga akusado asin mayong pagkakataon na magkarani o magkaigwa nin koneksyon sa lambang saro.
Si Arnolfo ‘Arnie’ Teves Jr., dating kongresista kan Negros Oriental an presenteng yaon sa National Bureau of Investigation Detention Facility Building 14 kan New Bilibid Prison sa syudad kan Muntinlupa.
Kinakaatubang kaini an mga kasong may kinaraman sa paggadan, illegal possession of firearms, illegal possession of explosives asin iba pa. Magin man an sinapo ni former Negros Oriental Governor Roel Degamo kaidto an iyo man an pigtutukdong mastermind sa likod kan paggadan.
Mientrastanto dae man pinahimutikan ni Retired Judge Jaime B. Santiago na igwang kakulangan sa saindang pasilidad tangani mapagsaro sana sa laog kan kulungan an dating kongresista.
Taliwas ini sa saiyang primerong nabanggit na planong solo sana si former Negros Oreintal Representive Teves Jr. sa saiyang piitan.
Alagad sa ibong man kaini, pigsierto pa kan presenteng direktor kan kawanihan na saindang sineseguro an kasalbaduhan sa buhay kan dating kongresista.
Kun saen naka-monitor soboot sinda nin 24 oras mamantinir sana an kasalbaduhan kan nasambitan ng akusado mantang nasa saindang kustodiya.
