Sinaysay kan legal counsel ni dating Negros Oriental Representative Arnolfo ‘Arnie’ Teves Jr. na posible sindang magsunad nin sarong petisyon tanganing hagadon sa korte na tugutan ining makapagpyansa.
Maski patung-patong an mga pigkakahampang na kaso kan dating kongresista sa manlaen-laen na korte sa nasyon, ini man saindang pigkokonsiderar.
Sigun sa saiyang abogado na si Atty. Ferdinand Topacio na an pagsusunad nin ‘petition for bail’ an sainda pang pinag-uulayan na gibuhon komo paagi sa kampo ni former Congressman Arnie Teves Jr.
Sigun digde, bakong harayong gibuhon ninda ini alagad dagos man na nilinaw na sainda pa ining pag-uulayan orog na sa parte kan legal counsel kaini.
Kun sain ipinaliwanag kan abogadong si Atty. Topacio na haros kakaabot pa sana ni Congressman Arnie Teves Jr. sa Pilipinas gikan kan makabweltada liwat sa nasyon sa Timor-Leste.
Kaya man laoman asin antabayanan na sana kan publiko kun anong masunod na lakdang an sainda pang gigibuhon tanganing depensaran an dating kongresista kontra sa mga alegasyon asin kinaka-imbweltuhan kaining mga kaso.
Si former Negros Oriental Representative Arnolfo ‘Arnie’ Teves Jr., nag-aatubang sa mga kasong may kinaraman sa paggadan, illegal possession of firearms, illegal possession of explosives asin iba pa.
Kabali man igdi an alegasyon sa saiyang pagkaka-imbwelto soboot sa paggadan ki Negros Oriental Governor Roel Degamo kan nakalihis na taong 2023.
Kun sain pig-aakusaran asin pigtutukdo ining mastermind sa likod kan madugong paggadan, duwang taon an nakalihis.
Alagad siring kan mga patung-patong na kasong kinakaatubang kaini, pinag-orgulyo man kan saiyang legal counsel an pagigin preperado tangani madepensaran an mga pang-aakusar kontra sa dating kongresista.
Sigun ki Atty. Ferdinand Topacio na sinda igwa man na mairerepresentang mga ebidensya sa korte siring man pirang taon na ninda soboot ining pinagprepararan.
Nakatalaan na umatubang si Former Negros Oriental Congressman Arnie Teves Jr. sa Regional Trial Court sa Manila, Branch 51 para sa kaso kaining may kinaraman sa murder o paggadan.
Mientrastanto, digdi babasahan kan sakdal alagad ikukundusir na sana an pag atendir kaini sa paagi nin online video conference na primero na man na kinumpirmar kan National Bureau of Investigation.
Janine
