Matrayumpo na naisagibo an pagpapapuli sa pirag mga Pilipinong nagtatatrabaho sa luwas kan nasyon na naipit sa naglalalang tensyon sa Middle East.
Kun saen nakabalik na nin Pilipinas an nasa 18 Overseas Filipino Workers na na-repatriate gikan sa nasyong Tel Aviv asin Jordan na iyong sinasabing na-stranded sa Dubai.
Pigheras kan Department of Migrant Workers na lunad kan sarong eroplano an mga Pilipinong ini na iyong nakaabot sa Ninoy Aquino International Airport Terminal 1 kansubagong pasado alas 9:30 nin pagkaaga.
Huli man kaini, sainda na ining inasiste kasabay kan pagsabat kan presenteng sekretaryo kan kagawaran na si Migrant Workers Secretary Hans Leo Cacdac, kaiba pati si Overseas Workers Welfare Administration Administrator Patricia Caunan.
Antes pag abot kan 18 OFWs sa nasyon, pigtawan sinda nin inisyal na tabang kan Embahada asin man kan Migrant Workers Office sa Tel Aviv na apektado kan missile na nagbagasak sa Rehovot, Israel kan nakalihis na Hunyo 15.
Huli man sa labing nadanyaran kan missile an mga apartment, istaran asin kagamitan kan mga Pilipinong ini, sa pangengenot ni Labor Attache Rodolfo Gabasan kan MWO, nagheras sinda nin relief packages.
