NAGA CITY- Kakulangan sa mga classroom an nairehistro na problema kan sarong eskwelahan sa terser distrito kan Camarines Sur kasabay kan pagpupuon nin klase.
Sa entrevista kan Bombo Radyo Naga ki Nerio Melano M. Sibulo III, Principal III kan Ocampo National High School, sinaysay kaini na grade 10 asin senior high school student an kulang sa pasilidad o classroom huli man sa halangkaw na enrollment.
Katakod digde, padagos an paghagad nin tabang kan nasambitan ng eskwelahan sa mga stakeholders para sa pagpapatindog kan temporary learning shelter.
An shelter na ini an magseserbeng paramientras na dagusan kan mga estudyante tanganing makapagpadagos kan saindang pag-aadal.
Sigun ki Sibulo, naoogma soboot an saindang lado nin huli sa suporta na ipinapahiling kan mga magurang orog na tanganing masimbagan an problema sa kakulangan nin mga classroom sa saindang eskwelahan.
Dugang pa kan principal halawig nang panahon an pigsapo kan mga estudyante huli sa kakulangan nin classroom kun kaya nangangapudan ini sa Department of Education na masimbagan na an saindang problema.
Dae na soboot epektibo an shifting asin kaipuhan na an pagpano sa mga kakulangan sa laog kan eskwelahan.
Sa ngunyan, hagad na sana kan opisyal na madangog kan namamayo sa DepEd an saindang agrangay para sa kapakanan kan mga kaakian.
