Pigreport kan Philippine National Police (PNP) na generally peaceful an nagin pagbubukas kan mga eskwelagan sa bilog na nasyon kasuodma para sa school year 2025-2026.
Pighayag ni PNP Chief PGen. Nicolas Torre III na nagin salbado asin matoninong an nagin enot na aldaw kan pagbweltada sa eskwelahan kan mga estudyante asin nagpromesang mas papahigoton pa an police visibility sa mga eskwelahan sa mga masunod pang aldaw.
Maikokonsiderar man na nagin matrayumpo an pagbubukas kan mga eskwelahan sa tabang kan mga ahensiya, lokal na gobyerno, mga pulis, mga paratukdo, magin an mga magurang.
Kasunod kaini, pinagtibay man ni Torre na padagos an saindang pakikipag-koordinar sa mga eskwelahan tanganing masierto na matatawan min bastanteng proteksiyon an mga estudyante sa bilog na nasyon.
Mientrastanto, padagos man an nagigin mahigot na koordinasyon asin pakikipag-diyalogo kan PNP sa Department of Education (DepEd) tanganing masierto na magigin salbado an mga estudyante sa laog o maski sa luwas man kan saindang eskwelahan.
