Inihayag kan Department of Justice na posibleng bako sanang 34 an mga nawawarang sabungero kundi posibleng nasa labi sa 100 an mga biktima.
Ini mismo an pigheras kan presenteng sekretaryo kan kagawaran na si Secretary Jesus Crispin Remulla makalihis ining mahapot manungod sa mga dae pa nahahanap na mga sabungero.
Sigun kaya sa Justice Secretary na basado sa mga isinawalat kan nakaulay kaining testigo na bistado man komo si alyas ‘Totoy’, pwedeng siring kadakol an mga biktimang sabungero.
Kun saen nabanggit man kaini na dae mababa sa sampulong personalidad o mga pangaran an imbwelto sa likod kan mga insidente nin pagdukot asin paggadan.
Kaya man siring na sana an saiyang pag asegurar sa publiko na sainda ng pinoproseso an mga kapot na impormasyong pigheheras kaini.
Marurumduman na kan nakalihis na aldaw sana, pigbuyagyag kan saro sa mga akusado an mga naaaraman kaining impormasyon mapadapit sa mga nawawarang sabungero.
Pighayag ni alyas ‘Totoy’ na gadan asin inilubong na soboot an pinaghahanap pang 34 na sabungero.
Kaya man huli sa rebelasyong ini, mawot kan mga kaparientes ninda na liwat makaulay an presenteng sekretaryo kan Department of Justice.
Tulos man ining sinimbag ni Secretary Remulla asin pigsierto na kaulayon an mga ini alagad bako pa sa ngunyan tangani mailatag kaini nin marahay an mga iheheras na impormasyon.
Sa presente, dae pa man sigurado kun igwa nin katotohanan an mga rebelasyong ibinulgar kan dae na nagpabistong testigo manungod sa mga nawawarang sabungero.
Alagad sineguro pa man kan kagawaran na gigibuhon ninda an gabos tangani matukoy an katotohanan sa likod kan nasambitan ng isyu na nasa apat na taon ng dae pa nakukua.
