Nagpapadanay an Department of Justice nin kumpyansa na makukua asin maaaresto an puganteng si Charlie “Atong” Ang.
Segun ki Prosecutor General Richard Anthony Fadullon, nagtitiwala sinda sa mga operasyon na ginigibo kan Philippine National Police o kan mga awtoridad tanganing matunton an lokasyon kan akusadong negosyante.
Dawa dai pa man naaaresto sa presente, segun sa sainda, padagos na nakikipag-ugnayan an DOJ sa ‘law enforcement agencies’ kan gobyerno.
Naglalaom sinda na maihaharap sa hukuman an puganteng si Atong Ang para sa mga kaso kaining kinakahampang manungod sa pagkawara kan mga sabungero.
Maroromdoman na sinangatan ini nin mga kaso asin pinaparatangan na ‘mastermind’ suboot sa ‘missing sabungeros case’.
Si Charlie ‘Atong’ Ang an nakakahampang sa kasong ‘kidnapping with homicide’ asin ‘kidnapping with serious illegal detention’ manungod sa pagkawara kan mga sabungero.
Sa huring ibinahagi ni Prosecutor General Fadullon, napansin suboot kan kagawaran na paurag-urag nang nawawara an mga pamilya o ‘complainants’ sa ‘missing sabungeros case’.
Saro na sana suboot na kaarak o pamilya an padagos na nakikipag-ugnayan sa Department of Justice manungod sa kasong inihain.
Alagad, idiniin kan DOJ na dai maapektuhan an ‘missing sabungeros case’ dawa pa dai na makontak an pamilya kan mga nawawarang sabungero.
