Nagpatanid si dating Supreme Court Associate Justice Antonio Carpio na mawawaran nin derichos na magsumiter nin kasimbagan si Vice President Sara Duterte kun mabibigo ining makapagpasar nin reply sa writ of summons na iniluwas kan Senate impeachment court kan Hunyo 10.
Dawa posible pa man ining magpresentar nin ebidensya, pigtawan-duon ni Carpio na nasa kapangyarihan na kan Senado kun tutugotan pa si Duterte na makapaglahad nin depensa maski lampas na sa itinalaang deadline.
Marurumdoman, an 10 aldaw na palugit para sa saiyang reply an nagtapos na kan sarong aldaw, Hunyo 21, alagad huli ta ini sa Sabado, posibleng magsumiter pa an kampo ni Duterte hasta ngunyan na Lunes (Hunyo 24).
Pigkumpirmar man kan tagapagtaram kan impeachment court na si Atty. Regie Tongol na mapadagos an paglilitis dawa dae magsimbag si Duterte sa summons.
Kumpiyansa man si Carpio na masumiter nin kasimbagan an lado ni Duterte nin huli ta magigin mapanganib ini sa saindang depensa kun dae magsumiter.
Katakod kaini, sinaysay man ni Carpio na posibleng ilangkaw kan Korte Suprema sa Senado na ipadagos an paglilitis, asin may kapangyarihan an impeachment court na mag-subpoena nin bank records—saro soboot na importanteng parte kan proseso.
Marurumdoman, an impeachment complaint kontra ki Duterte an katakod kan soboot pag-abuso kaini sa confidential funds kan gobyerno, dae maipaliwanag na yaman, kaugnayan sa extrajudicial killings sa Davao City, asin an kontrobersyal kaining pahayag na garo nagbabantang gadanon sinda Presidente Ferdinand Marcos Jr., First Lady Liza Marcos, asin Speaker Martin Romualdez.
