Bakong marahay an hinala ni dating Senador asin Mamamayang Liberal (ML) Party-list Representative-elect Leila de Lima sa timing kan paghagad kan Ombudsman nin paliwanag ki Vice President Sara Duterte.
Manungod ini sa rekomendasyon kan House Committee on Good Government na sunadan si VP Duterte kan mga kasong plunder, technical malversation, asin iba pa katakod sa soboot salang paggamit nin confidential funds kan Office of the Vice President (OVP) asin Department of Education (DepEd) sa irarom kan saiyang pamamayo.
Kapansin-pansin para ki De Lima na magkakatugma asin nagpapahiling nin sarong pattern an sunod-sunod na mga aksyon — gikan sa biglaang kasuguan kan Ombudsman na magsumiter nin counter-affidavit hasta sa nakabinbing petisyon sa Korte Suprema na kinukuwestiyon sa pagpapasar kan Articles of Impeachment.
Sa hiling kaya ni De Lima, parte kan estratehiya na posibleng aaksyunan tulos kan Ombudsman Samuel Martires an isusumiteng counter affidavit kan Bise Presidente tangani ibasura an mga kasong inirerekomendang isunad digde na makaaapektar sa kinakaatubang kaining impeachment case.
Binanggit pa ni De Lima na si dating Presidente Rodrigo Duterte an nagtalaga ki Martires kaya dae malikayan na mapagdudahan an mga lakdang kaini ngunyan.
