Mayo nin dapat na ikahadit an publiko asin man mga eksperto katakod sa pinaglalaomang epekto sa ekonomiya kan Pilipinas, kan propwesto kan Amerika na patawan nin buwis an remittances kan mga foreign workers sa saindang nasyon.
Sigun ki Palace Press Officer Claire Castro na basado sa pag-aadal kan Department of Finance, dae pa maabot sa sarong porsyento an pinaglalaomang epekto sa gross domestic product (GDP) kan nasyon enkaso mapirmahan an propwestong ley.
20% man sana soboot kan 4.4-milyong OFW sa Amerika an maaapektaran, partikular an mga non-US citizens, kabali an mga green card holders asin may working visa.
Dugang pa kan DOF, dae sakop kan kabilogang 41% kan remittance na nareresiber kan Pilipinas gikan sa Amerika an gikan sa mga Pilipino duman, nin huli ta kadaklan an pig aagi sa mga bangko an transaksyon.
Mapakol sa $100-million an malulugi kan Pilipinas gikan sa kabilogang $36.5-billion na projected remittances sa Amerika sa 2026.
Sigun man sa Bangko Sentral ng Pilipinas, 90% kan remittance kan mga OFW sa Amerika an piggagastos sa pagkakan asin mga kaipuhan sa harong kan saindang pamilya sa Pilipinas.
Napagaraman kan gobyerno na bagaman dikit an magigin epekto kan propwestong polisiya sa ekonomiya kan Pilipinas, posibleng dakula an epekto kaini para sa mga Pilipinong naglalaom nin remittance gikan sa saindang non-US citizen na kaparientes sa Amerika.
