NAGA CITY – Ipigheras kan Department of Public Works and Highways Region 5 an mga resposibilidad pag-abot sa road construction asin road signanges sa Bicol region.
Sa nagin paghampang sa mga kagawad kan media ni Engr. Raymond Yap, Assistant Division Chief, Maintenance Division, DPWH Region 5, sinaysay kaini na mandato kan nasambitan ng departamento iyo an mag plano kan mga road access para sa ikaka-kontribwer kan paglangkaw kan ekonomiya kan Pilipinas.
Dugang pa kaini, makalihis man an sainda soboot na plano, sainda na ining pigpipikonstruhir, siring man makalihis kaini sainda man na pigmamantinir an saindang nahaman na mga tinampo tanganing ma-ibweltada an orihinal na disenyo.
Mientrastanto, mapadapit man sa road safety igwa soboot pigsusunod na probisyon an DPWH para man sa kasalbaduhan kan mga motorista siring man an mga nanggagamit kan tinampo.
Sigun pa ki Yap, mapadapit sa mga raraot na tinampo, igwa sindang maintenance tanganing mapakarhay an mga ini, alagad sa sobrang dakol na kan mga raot asin ralabot na tinampo dae na soboot pigkakaraya kan saindang budget.
Siring man sa ngunyan, an sekretaryo kan nasambitan ng ahensiya an naggigibo na man nin paagi tanganing madugangan an saindang budget for maintenance fund.
Pigtawan-duon pa kan opisyal na mapadapit man sa road worthiness kadakol man sindang pig-aagihan na mga probisyon asin tangani man na dae tulos soboot ini maraot nag-aagi ini sa quality test kun saen ngunyan man na taon, an DPWH-Region 5 an kadakol na proyektong nai-propose asin na-implementar siring na sana kan mga solar lighting sa mga tinampo bako sana sa mga national road magin sa mga probinsiya asin barangay road.
Sa ngunyan nagpasalamat na sana si Yap, partikularmente sa motor vehicle user’s charge (MBUC) kan LTO sa pagtatao nin pondo sa pagpapailaw sa mga tinampo.
