NAGA CITY – Pigtawan-linaw kan Metropolitan Naga Water District an pagwara kan tubig tuyong igwang power interruption. Sa entrevista kan Bombo Radyo Naga ki Choppy Dy. Liancco Dela Cruz, Public Relations Officer, MNWD, sinaysay kaini na sa laog kan duwang segundong pagkawara kan kuryente, mashut-down man tulos soboot an pumping station kan tubig kun saen an gabos na tubig na yaon sa transmission line o distribution line an madiretso pasiring sa low lying areas kan kasentrohan kan siyudad nin Naga.
Dugang pa kaini na an kadaklan na pumping station kan nasambitan ng water district an yaraon sa upper barangay kan nasambitan ng siyudad.
Katakod kaini, kun nagbweltada na man an kuryente dae soboot tulos-tulos makakapa-andar an mga operators sa pumping station huli man ta kaipo pa kaining mag-flashing antes i-inject sa system tanganing ma-asegurar na an mga tubig na piglalaog sa mga transmission asin distribution line an malinig.
Sigun pa ki Dela Cruz, madurar nin 30 minutos hasta 45 minutos antes makadevelop na naman nin pressure huli man ta papanuon pa kaini an transmission line asin mga lateral lines tanganing magkaigwa nin bulos kan tubig an lambang kaharongan na sakop kan MNWD.
Sa ngunyan, pagiromdom na sana kan opisyal sa publiko orog na sa mga konsumidores kan nasambitan ng water district na pirming magpasiguro nin tubig maski na makusog an pressure kaini huli man ta dae man soboot aram kun anong oras asin aldaw mawawara an pagpapa-andar kan mga pumping station asin huli man ta an linya kan tubig an bakong siring kan linya kan kuryente.
