Liwat na dinepensaran ni U.S. President Donald Trump si Israeli Prime Minister Benjamin Netanyahu asin inapod na “political witch hunt” an ginigibong paglilitis kontra digde.
Sigun ki Trump, “terible” asin man bakong makatarungan para ki Netanyahu, na pigkokonsiderar kaining sarong “War Hero” asin lider na dakula an nagin kontribusyon sa relasyon kan Israel asin Estados Unidos, pati na man sa pagresolbar sa huma kan Iran.
Sa sarong post sa Truth Social, sinabi pa ni Trump na an paglilitis an makakaapektar sa negosasyon ni Netanyahu sa Hamas, na kinaiimbweltuhan kan pagpapabalik kan mga hostages.
Tinuligsa man kaini an padagos na paglilitis sa Prime Minister sa ibong kan mga seryosong isyu siring na sana kan seguridad kan nasyon.
Pigtuyaw pa kan Presidente kan Amerika an mga pag-aakusa ki Netanyahu, siring kan pag ako kan mga mamahalong gamit gikan sa mga negosyante karibay kan mga pabor sa politika.
Mientrastanto, padagos na ipinaglalaban ni Netanyahu an saiyang pagigin inosente asin man maduon na pinahimutikan an mga akusasyong laban sa saiya.
Marurumdumang nagpuon an paglilitis para sa Prime Minister kan nakalihis na taong 2020 para sa mga kasong bribery, fraud, asin breach of trust.
