Masunad na nin kaso sa National Bureau of Investigation (NBI), sa Miyerkules, si Senadora Risa Hontiveros kontra ki Alyas ‘Rene’ — an bumaliktad na testigo sa pagdangod kaidto dapit sa mga pang-aabuso soboot ni Pastor Apollo Quiboloy.
An kasimbagan ni Hontiveros an kasunod kan naglalakop na video ni Alyas ‘Rene’ kun saen inaakusaran kaini an senadora na binayadan ini nin P1 million tanganing magtestigo sa mga seryosong kaso kontra ki Quiboloy asin idawit sinda dating Presidente Rodrigo Duterte asin Vice President Sara Duterte.
Apwera ki Alyas ‘Rene’ susuadan man kan senadora an mga nagluwas kan naglakop na video.
Sigun sa senadora, bako sanang fake news an video kundi saro man na witness tampering o pananakot sa testigo.
Salaysay ni Hontiveros, si Alyas ‘Rene’ an paulit-ulit na nagrani sa saiyang opisina—dae ini tinakot asin pinirit kundi ini an naghapad sa saindang opisina tanganing magpahayag kan saiyang lado.
Pagbuyagyag pa kan senadora, kan February 7, 2024, si Alyas ‘Rene’ an naghagad nin kwarta tanganing ipangbakal nin laptop—kun saen malinaw soboot an polisiya kan saiyang opisina na dae sinda nagtatao nin financial assistance sa potential witness.
Kaya man dae na soboot magtataka pa an lehislador na kun Kingdom of Jesus Christ—na pinamamayohan ni Quiboloy an nagbayad ki Alyas ‘Rene.’
Kan February 22, 2024, pig-enkaminar man soboot an dating testigo na bumawi sa hearing tanganing mapasupog si Hontiveros.
Kaya man dae soboot palalampason ni Hontiveros na takuton ninda an mga testigo asin sindakon an Senado komo institusyon.
