Amay na pinagpreparan kan Philippine National Police (PNP) an nagdadangadang na ikaapat na State of the Nation Address (SONA) ni Presidente Ferdinand Marcos Jr. para sa ngunyan na bulan nin Hulyo.
Sa sarong pulong balitaan sa Kampo, kinumpirmar mismo ni PNP Chief PGen. Nicolas Torre III na igwa nang mga inisyal na dayalogo sa pag ultanan kan Pambansang Pulisya asin kan mga katabang na ahensya, kaali na an Office of the Sergeant-at-Arms kan Kamara de Representantes para sa pag-urulay kan seguridad sa papaabuton na SONA.
Bagaman dae muna nagtao an hepe nin eksaktong numero kun pirang mga kapulisan an itatalaga sa mismong aldaw kan SONA, pig asegurar man ni Torre na prayoridad ninda sa aldaw na ini an katuninungan asin kasalbaduhan kan publiko asin man kan mga maatendir.
Sigun ki Torre, obheto kaini na siertuhong magigin pakarhay an latag kan seguridad sa Batasang Pambansa kun saen ikukundisir an ikaapat na SONA kan Presidente.
Mientrsatnto sigun pa sa hepe, dawa sa mga nakalihis na SONA kadakol pang mga isyu na kakaatubangon an saindang kabo dawa pa sinda igwa nin pigsusundang template para sa nasambitan ng event.
Ini an katakod pa man sa mga isyung politikal partikular na sa urulay impeachment ni Vice President Sara Duterte na iyong posibleng makaapektar sa bulos kan magigin programa sa aldaw na ini.
Pigsierto man ni Torre na an mga siring na klase nin sitwasyon an padagos na nindang pigmomonitor, inaantabayan asin kaiba man sa saindang preparasyon.
Mientrastanto, sigun man sa National Capital Region Police Office (NCRPO), matalaga sinda nin mga dae mababa sa 21,000 na kapulisan sa aldaw kan SONA kan Presidente gikan man sa manlaen-laen na distrito kan Kamaynilaan.
Dae pa kabali digde an contingent o additional forces na posibleng ipadara gikan sa Armed Forces of the Philippines (AFP), Philippine Coast Guard (PCG), asi man Bureau of Fire Protection (BFP).
