Photo ©web

Ipinagsugo ni Presidente Ferdinand Marcos Jr., an mga concerned government agencies na linigan an mga drainage asin estero orog na asin tag-uran na ngunyan o rainy season.

Makakatabang kaya ini tanganing malikayan an marekas na pagbaha orog na sa Metro Manila. An direktiba ni Presidente Marcos an huli sa tag-uran na asin igwang mga bagyo na man na piglalaoman.

Sigun ki Palace Press Officer USec. Claire Castro, mawot kan Presidente na magin preparado an gobyerno tanganing simbagan an posibleng epekto na dara kan makusog na pag-uran asin bagyo.

Naireport man ni Castro na igwang piggigibong pagpepreparar an Metro Manila Development Authority (MMDA) kun saen nasa 23 priority estero sa National Capital Region an saindang lilinigan kun saen gagamitan nin makabagong ekipahe tanganing malinigan tulos an mga kanal.

Advertisement

Partikular na pigsugo kan Presidente an DPWH asin an Department of Labor and Employment (DOLE) para duman sa gigibuhong paglilinig. Imo-mobilized kan DOLE an mga TUPAD beneficiaries tanganing magtabang sa paglilinig kan mga estero.

Pinagsierto man kan Presidente na an NDRRMC asin mga local disaster officers an magin preparado tanganing magin first responders.

Sa ngunyan pigsugo kan DILG an mga Local Government Units na pakusugon an saindang emergency preparedness measures. Pigsierto man kan Malakanyang na sa panahon kan kalamidad laoman kan publiko an tulos na paghiro kan gobyerno.

Nangapodan man si USec Castro sa publiko na maghiro, likatan na magkalat asin iapon nin marhay an mga basura.

Advertisement