Pigsaysay kan Hamas na preparado sindang tolos na pag-ulayan an dapit sa kaplanuhan na ceasefire sa Gaza.
Ini an kasabay kan nagpapadagos na bagong opensiba kan Israel sa lugar na ikinagadan kan labi 50 katao.
An kapahayagan na ini an kasabay kan pigsagibong konsultasyon sa ibang mga Palestinian factions asin antes an pagbisita ni Israeli Prime Minister Benjamin Netanyahu sa Washington, kun saen padagos na pigbubusol ni US President Donald Trump an pagtatapos kan giyera na ngunyan an nasa ika 21 bulan na.
Katakod digde, preparado soboot sinda na magdangog sa serye kan negosasyon para sa pigbubusol na untuk-putukan kaibahan an mga mediators na nasyon siring kan Amerika.
Sigun sa Hamas pigsusuportaran ninda an untuk-putukan alagad pighuhurot an pagkakaigwa nin garantiya na dae mapadagos an pag-atake kan Israel sa Gaza.
Marurumduman an kariribukan sa Gaza an nagpuon kan nakalihis na October 7, 2023,kun saen pig-atake kan Hamas an lado kan Israel.
Duwang untuk-putukan naman an naipautob sa lugar sa antes na magpadagos an giyera.
Sa ngunyan, padagos an mga lakdang na ginigibo tanganing maibusol an katuninongan sa lugar.
