Pigpaplano kan beteranong bigman na si Jonas Valančiūnas an pagkakawat sa EuroLeague sa ibong kan marahay na karera sa National Basketball Association (NBA).
Sa pagpuon kan free agency, na-trade si Valančiūnas gikan sa Sakramento Kings pasiring Denver Nuggets, mantang igwa man ining natatadang $20 million sa saiyang presenteng kontrata.
Siringpaman, sinabi kan kampo kan bigman na pinag-aadalan kaining magkawat sa European basketball makalihis ining alukon kan Panathinaikos Athens.
Sa presente, nasa Athens an batikang sentro mantang padagos an negosasyon para sa saiyang magigin kontrata kun madagos ining magkawat sa Europa asin man dagusang iwalat an NBA.
Primerong na-draft si Valančiūnas sa NBA kan nakalihis na taong 2011 komo ika-limang overall pick. Pinili ini kan Toronto Raptors alagad makalihis an pirang season kaiba an koponan, dagusan man ining nagbalyo sa Memphis Grizzlies, New Orleans Pelicans, asin Washington Wizards.
Sa nakalihis na season, kapot kan 33 anyos na si Valančiūnas an average na 10.4 points, 7.7 rebounds asin man 2.0 assists per game.
Sa paglaog kaini sa Panathinaikos, nilalaomang makakaibahan kaini an batikang EuroLeague player na si Mathias Lessort. An duwa an pinagkokonsiderar na pinakamagabat na sentro sa bilog na liga, oras na magkaibahan na sindang magkawat.
Sa presente, kapot kan Panathinaikos an pitong EuroLeague championship asin man sarong International Cup.
