Posibleng mapasiring na sa gobyerno kan siyudad nin Makati an bilog na pagsasadiri kan Makati City Subway Inc. (MCSI), sigun ki dating Makati Mayor Abigail “Abby” Binay-Campos, makalihis an arbitral proceedings sa Singapore International Arbitration Centre (SIAC).
Alagad pigkuwestiyon kan bagong elehir na alkalde na si Nancy Binay an sarong “midnight settlement ” na piglaog kan nakalihis na administrasyon pitong aldaw antes an pagtatapos kan saindang termino.
Nakasaysay kaya sa kasunduan na nagbayad soboot an Makati nin P8.96 billion sa private partner na Philippine InfraDev Holdings Inc. sa laog kan 90-aldaw makalihis an pinal na desisyon kan SIAC.
Sigun ki Binay-Campos, an settlement an magtatao nin bilog na pagsasadiri kan MCSI na igwang kantidad $1.6 billion, kaibahan an mga daga asin assets, karibay kan $160 milliom komo kabayadan sa aktuwal na gastos kam InfraDev sa proyekto.
Pig-abrobaran soboot ini kan auditing firm na PricewaterhouseCoopers (PwC).
Alagad sinaysay ni Mayor Nancy Binay na pwedeng mabugtak sa peligro an pampinasyal kan siyudad, orog na ta an proyekto an kanselado na makalihis mawaran nin busa an nagkapirang parte kan subway huli sa desisyong pigluwas kan Korte Suprema na nagbaluo kan nagkapirang mga barangay sa Taguig.
Kun kaya pigsugo na ni Mayor Binay an pagsusunad kan opisyal na posisyon kan siyudad sa SIAC asin magluwas nin executive order tanganing magbilog min fact-finding committee tanganing imbestigaran an gabos kan public-private partner projects na nilaog kan nakalihis na gobyerno.
Marurumduman na an Makati Subway Project, na pinuonan kan nakalihis na 2018, an planong magkaigwa nin 10-kilometrong subway gikan sa EDSA-Ayala hasta ospital kan Makati, na piglalaomang makakatabang sa 700,000 na pasahero kada aldaw asin makakabawas nin 270,000 na lunadan sa siyudad.
Alagad napundo ini kan nakalihis na 2022 huli sa isyu sa pagbabalyo kan mga barangay siring kan Cembo, Comembo, East Rembo, Pembo, Pitogo, Post Proper Northside, Post Proper Southside, Rizal, South Cembo, West Rembo, asin Fort Bonifacio sa Taguig City.
