Nagdugang nin nagkapirang players an Gilas Pilipinas na masabak sa FIBA Asia Cup sa Saudi Arabia sa masunod na bulan.
Sigun ki Gilas Pilipinas coach Tim Cone, na kabali sa mga pigdugang kaining parakawat iyo sinda RJ Abarrientos, Troy Rosario, Zavier Lucero asin Rhenz Abando.
Pigsagibo ni Cone an anunsiyo kasabay kan pagpupuon kan enot na aldaw na practice kan Gilas Pilipinas para sa nasambitan ng torneo.
Kaibahan sa nag-atender kan practice si Abarrientos asin Rosario mantang nasa US pa si Lucero asin si Abando an nasa Strong Group Athletics na mapartisipar sa William Jones Cup sa Taiwan.
Mientrastanto, piglinaw man ni Cone na temporaryo sanang kaiba sa listahan an nasambitan ng mga players para sa Asia Cup na mapuon sa Agosto 5.
Dae man naka-atender sa ensayo si June Mar Fajardo huli sa saiyang calf injury mantang sa mga masunod na aldaw an paabot na sa nasyon sinda Justin Brownlee asin AJ Edu.
