Inamin kan Private Hospitals Association of the Philippines Inc. (PHAPI) na igwang mga miyembro ninda an dae nag-aako nin guarantee letters para sa mga indigent na pasyente huli sa pagkakauktaba kan saindang mga bayad.
An guarantee letters an iniluluwas kan gobernador, senators, congressman asin nagkapirang mga opisyal kan gobyerno para tabangan an pasyente na makapagbayad kan saindang hospital bills.
Pigkukua an nasabing pambayad sa paagi kan pondo kan Department of Health sa paagi kan pagsusumiter nin promissory notes.
Sinabi ni PHAPI president Dr. Jose Rene De Grano na sa Calabarzon pa sana, igwang P400 milyon na bayad para sa guarantee letters sa irarom kan Medical Assistance for Indigent and Financially Incapacitated Patients (MAIFIP) program.
An pagkauktaba kan bayad kaya an makakaapektar sa operating expense kan mga ospital.
Pigsierto man sa sainda kan Departmetn of Health na igwa man na bastante na pondo para sa pambayad nin mga delayed na nakapagbayad nin hospital bills.
Mientrastanto, Sa pagbubukas kan 20th Congress, ibubusol ni TGP Party-list Rep. Bong Teves na imbestigaran kan Kamara an dae pa man nababayadang utang kan PhilHealth sa nagkapirag pribadong ospital.
Sigun ki Teves, target kan imbestigasyon na matukoy an rason tano igwa nin balanse pang utang sa mga private hospitals kun igwa ninalokasyon para dihde sa irarom kan national budget.
An lakdang ni Teves an kasimbagan sa anunsyar kan Private Hospitals Association of the Philippines Inc. na dae muna sinda maako nin guarantee letters.
