Nagtutubod an House prosecution panel na an mga ebidensyang iprinisentar manungod sa salang paggamit kan confidential funds, pwedeng magresulta sa kriminal na pagkonbikto ki Bise Presidente Sara Duterte, kasunod kan pinal na desisyon kan Commission on Audit (COA).
Segun ki prosecution spokesperson Zia Alonto Adiong, kinumpirma kan COA an disallowance kan P73.287 milyon na confidential expenses kan Office of the Vice President (OVP) kan Disyembre 2022.
Sinabi ni Adiong na an mga findings kan COA posibleng magin basehan sa pagpasangat nin suway na kasong kriminal kontra sa bise presidente.
Sa impeachment trial, nagpresentar an prosecution nin mga dokumento asin testimonya manungod sa mga acknowledgment receipt, pagbalyo kan confidential funds sa mga security officer, asin pagsunod sa mga patakaran sa paggamit kan nasabing pondo.
Dawa ngani binawi na kan prosecution an Article I manungod sa confidential funds, iginiit ni Adiong na pwedeng magpadagos an suway na audit asin iba pang legal na proseso sa luwas kan impeachment trial.
Pinili kan prosecution na magpokus sa Article II, na nagtutukar sa dae-maipaliwanag na yaman ni Duterte, huli ta nagtutubod sinda na sapat na an sarong pagkonbikto tanganing makamit an saindang konstitusyonal na katuyuhan sa impeachment case.
