NAGA CITY- Pighihiling na mapakol sa poco mas o menos kabangang milyon an winalat na danyos sa nangyaring kasulo sa Villa Robredo, Barangay Sabang Naga City.
Sigun ki SFO1 Arwin Yap, Investigator kan BFP-Naga, tolong harong an nadanyaran sa insidente alagad duwa an nagsapo nin labing danyos.
Susog sa saindang paenot na imbestigasyon, nagpuon soboot an kasulo sa harong kan mga Paligar sa sarong kwarto sa ikaduwang palapag hasta sa maglakop ini asin madamay an duwang harong.
Katakod digde, nadipisilan soboot na maglaog sa area an nagrespondeng mga personahe kan BFP Naga nin huli ta sadit an area kun kaya labi an saindang pasasalamat sa mga tawo na nagsagibo nin bucket relay tanganing matumtom an kalayo.
Alagad an nagin problema soboot kan mga ini an maluyang tubig kun kaya dae tolos natumtom an kalayo.
Mientrastanto, sa pagtatarabangan kan mga residente asin kan BFP Naga siringman kan iba pang mga volunteers dae naman naglala pa an sitwasyon.
Sa ngunyan, liwat na nangapudan si Yap sa publiko na halion an mga nakasaksak na appliances sa harong enkaso maturog o maluwas kan saindang residensiya tanganing malikayan an kaparehas na insidente.
