Apektado na man an turismo sa probinsiya kan Batangas sa tahaw kan nagpapadagos na paghahanap asin pagrekober sa soboot mga lawas kan mga nawawarang sabungero na pinagtutubodang inapon sa Taal Lake.
Sigun ki Talisay Municipal Administrator Alfredo Anciado, dae pa man haros nakakabangon an industriya kan turismo sa probinsiya puon kan padapaon ini kan pandemiya asin pagsabog kan Bulkang Taal, panibagong dagok na naman an pigkakahampang kan sektor huli sa retrieval operations sa saindang lugar.
Sa may Talisay, na saro sa mga banwaang nakapalibot sa lawa, nahilingan nin marekaz na pagbaba kan tourist arrivals kun saen an pira an nagkanselar ma kan saindang reservations asin bookings.
Marurumduman na saro sa mga primerong pigdadayo kan mga turista sa Taal Lake iyo an pagbabangka duman huli man ta nahihiling an bulkan.
Kaya man nag-apelar ngunyan an lokal na gobyerno kan Talisay sa gobyerno na liwat tugotan an mga turista na makaabot sa Volcano Island maski na sa mga limitadong lugar sana siring kan tourism center.
Alagad, marurumdumang naenot ng ipinagbawal sa mga residente harani sa active volcano na dae muna magbalik, magin an mga turista an dae pigtutugotang makabisita sa Isla na pigdeklarang permanent danger zone kasunod kan pagsabog kan Bulkang Taal kan taong-2020.
Mientrastanto, apwera sa mga turismo, naenot na mang naireport na apektado iyo an kabuhayan kan mga parasira asin bentahan kan endemic na Tawilis gikan sa Taal Lake huli sa mga nadiskubreng mga sako kan pinagtutubodang mga buto, alagad dae pa man naaaraman kun ini an sa mga nawawarang sabungero na pigsasabibg inapon sa lawa.
