NAGA CITY- Piglatag kan Comelec Naga an mga nakalinyadang aktibidad kaini sa bulan nin Agosto.
Sa entrevista kan Bombo Radyo Naga ki Atty. Maico Julia Jr, Comelec Officer kan LGU-Naga, sinaysay kaini na sa maabot na August 1-10 ikukundusir an voters registration.
Ini an para sa bagong registrant na nag-eedad 15 hasta 17-anyos asin 18-anyos pataas.
Kabali man sa mga itatangro na serbisyo kan komisyon an correction of entry asin reactivation para sa mga dae nakaboto sa mga nakalihis na eleksyon.
Sigun ki Julia, straight an voters registration asin an venue an isasagibo sa opisina kan Comelec Naga tanganing maakomodar an mga residente gikan sa 27 barangay kan siyudad.
Dugang pa kan opisyal, halipot man sana an peryodo kan nasambitan ng voters registration kun kaya kaipuhan na tolos na i-avail ini.
Mientrastanto, padagos man an preparasyon kan komisyon maski dae pa sierto na madadagos an Barangay asin Sangguniang Kabataan Election sa bulan nin Disyembre.
Ini nin huli ta, kaipuhan soboot na mag-antisipar kan saindang lado asin siertuhon na preparado sinda anuman an magigin disisyon dapit digde.
Katakod kaini, enkaso man na madagos an eleksyon an filing kan COC an isasagibo sa October 1 hasta 7 asin an kampanya an ikukundusir sa Nobyembre 20-29, 2025.
Sa ngunyan, pig-enkaminar na sana ni Julia an publiko na magparehistro tanganing lehitimong botante kan nasyon.
